Vier verdagtes sal op aanklagte van veediefstal voor die hof in Sasolburg verskyn

SASOLBURG - Die Hoofweg patrollie van die Fezile Dabi distrik het vier verdagtes, tussen die ouderdom van 22 en 48, gearresteer op aanklagte van veediefstal, Sateroggend 14 September. Volgens Sers. Josephine Rani was die polisielede besig met roetine patrollie toe hulle 'n wenk ontvang het oor 'n vragmotor wat moontlik met veediefstal verbind kan word. Die vragmotor is op die R57, onderweg na Sasolburg, opgespoor en voorgekeer. 13 Beeste is in die agterkant van die vragmotor gevind en die verdagtes kon nie die nodige dokumentasie vir die beeste in hul besit toon nie. Die verdagtes sal in aanhouding bly totdat hulle voor die hof in Sasolburg verskyn. Volgens Rani beklemtoon hierdie suksesvolle operasie die belangrikheid van samewerking van die publiek in die bekamping van veediefstal.